Sherbeny

رثاء عبدالرحمن الابنودي لجمال عبدالناصر-

من يمدحه يطلع خاسر … و يشبرولوا ايام يعيش جمال عبد الناصر
يعيش بصوته و احلامه فى قلوب شعوب عبدالناصر
مش ناصري و لا كنت في يوم بالذات فى زمنه و فى حينه , لكن العفن و فساد القوم نساني حتى زنازينه
ازاي ينسينا الحاضر طعم الاصالة اللى فى صوتوا … يعيش جمال عبد الناصر يعيش جمال حتى في موته
ماهو مات فعاش جمال عبد الناصر
اسمه جمال و كان جميل فعلا
ياما شوفنا شجعان خوافه .. عظيم و كان انسان طبعا المجد مش شغل صحافه
علشان ده عاش عبدالناصر
أعدائه كرهوا و ده نعمه .. من كرهوا اعدائه صادق
فقلبوا كان حاضن امة و همه و مبادىء ساكنين فى صوت عبدالناصر
ملامحنا رجعت بعد غياب .. دلوقتي بس اللى فهمنا , لا كان حرامي و لا كداب و لا نهبها مع اللى معاه
انا بحكي عن عبدالناصر
عشنا الحياة معاه كالحلم فلا فساد و لا رهن بلاد … يومها انتشينا ثقافة و علم و فى زمنه معشناش أحاد
كنا جموع في زمن ناصر
كان الامل فى خضرته بكر … مفيش لصوص للقوت و المال و مصر ابطال و رجال فكر و مثقفين ستات و رجال
جيوش جمال عبدالناصر
كان الهلال فى قلب صليب و لا شوفنا ديب بيطارد ديب و لا جرس خاصم مبنى وحدنا صوت عبدالناصر
دفعنا تمن الحرية بدم مش بدينار و دولار يوم وقفته فى المنشية خلا الرصاص يهرب من عار اعداء جمال عبدالناصر
رغم الحصار كنا احرار و فى الهزيمة الشعب مجعش … كان اسمها بلد الثوار و قرار زعيمها مبيرجعش قرار جمال عبدالناصر
خلا بلاده اعز بلاد ليها احترام فى الكون مخصوص لا شوفنا وسطوا فساد ولا خطط سمسرة و فلوس
كان الجميع عبدالناصر
لولا ما كنتوا اتعلمتوا ولا بقيتوا دراكولا …. يالي انتوا زعماء و انجازكوا دخلتوا مصر الكوكاكولا و بتشتموا فى عبدالناصر
عمره ما جاع فى زمانه فقير او ملتقاش دواء للعله دلوقتي لعبة اخطف طير و الامة فى خدمة شلة تكره جمال عبدالناصر

يتريقوا على طوابيره علشان فراخ الجمعيه شوفوه غيره دلوقتي و خيره حتى الرغيف بقى امنيه
يرحم جمال عبد الناصر
في ناس بتنهب و تسوس لا يهمها من عاش او مات و رضا العدو عننا يخوف معناه اكيد اننا هفوات
من يوم ما مات عبدالناصر

الارض رجعت للاقطاع و قالوا رجعت لصحابها و اهو صاحبك الفلاح اهو جاع بعت العقود اللى كتبها بخط ايد عبدالناصر
انا اذكرك من غير ذكرى و الناس بتفتكرك بخشوع .. الامس و اليوم ده و بكره يبكوك بعظمة مش بدموع
دلوقتي رجعوا الفقراء خلاص سكنوا جحورهم من تاني رحل معاك زمن الاخلاص  و جه زمن غير انساني مهوش زمن عبدالناصر
صحينا على زمن الغاز يحكمنا فيه اهل الاعمال اتوحشوا فى جمع الاموال و رجعنا سادة و خوادم ضد تجاه عبدالناصر
يا جمال نجيب زيك من فين يا نار يا ثورة يا ندهة ناي .. البوسطجي اللى اسمه حسين ابوك منين جابك
لو هكتبك ماتساع اقلام ولا كلام غالي و اوراق الامر و ما فيه انا مشتاق فقولت أمسي عليك و انام نومة جمال عبدالناصر

الرثاء بصوت الابنودي

  1. made-in-3gypt reblogged this from sherbeny
  2. wastinglifeon reblogged this from sherbeny
  3. urbanarab reblogged this from sherbeny
  4. sherbeny posted this